தமிழகத்தில் டிக் டாக் செயலியின் மூலம் பல்வேறு விபரீதச் செயல்கள் நடப்பதால் அந்தச் செயலியைத் தடை செய்ய வேண்டும் என்று கோரும் அளவுக்கு நிலைமை சென்று கொண்டிருக்கிறது. அதில் பதிவிடப்படும் சில புகைப்படங்களும் வீடியோக்களும் மக்கள் மத்தியில் அதிர்ச்சியை ஏற்படுத்தும் வகையில் உள்ளன.

டிக் டாக்

அந்த வரிசையில், நெல்லை மாவட்டத்தில் நாய்களுடன் முயல் வேட்டையாடுவது, நாயை விட்டு முயலைக் கடிக்க விடுவது, மான் கறி சமைத்துச் சாப்பிடுவது, காட்டுக்குள் அத்துமீறிச் சென்று வீடியோ எடுப்பது, காவல்நிலையங்கள் முன்பாக டிக் டாக் பதிவு செய்வது போன்ற சர்ச்சைகள் ஏற்கெனவே நடந்துள்ளன.

Also Read: ’டிக் டாக்’ திருமணம்… வேகம் பிடித்த பைக் பயணம்… – போலீஸிடம் சிக்கிய புதுமணத் தம்பதி!

இவ்வாறு சர்ச்சைக்குரிய வகையில் வீடியோ எடுத்து டிக் டாக் செயலியில் பதிவிட்டால் கடும் நடவடிக்கை எடுக்கப்படும் என காவல்துறை ஏற்கெனவே எச்சரித்துள்ளது. ஆனாலும் சிலர் தொடர்ந்து சர்ச்சைக்குரிய வீடியோக்களை பதிவிட்டு வருகிறார்கள். 

டிக் டாக் வெளியிட்ட தங்கராஜ்

நெல்லை-குமரி மாவட்ட எல்லையில் உள்ள பழவூர் கிராமத்தில் சுயம்புலிங்கம் என்பவர் 30-க்கும் அதிகமான பால் மாடுகளை வைத்து பால் வியாபாரம் செய்து வருகிறார். அவரின் மகன் தங்கராஜ் என்பவர் பால் மாடுகளைப் பராமரிக்கவும் பால் வியாபாரம் செய்யவும் தந்தைக்கு உதவியாக இருந்து வருகிறார்.

19 வயது இளைஞரான தங்கராஜ், மாடுகளைப் பராமரிக்கும் நேரம் தவிர மற்ற நேரங்களில் டிக் டாக் செயலியில் வீடியோக்களைப் பதிவிடுவதையே வழக்கமாக வைத்திருந்திருக்கிறார். தான் டிக் டாக் செயலியில் அனைவராலும் கவனிக்கப்படும் நபராக இருக்க வேண்டும் என விரும்பிய தங்கராஜ், ஒரு அணிலையும் பூனையையும் பிடித்து தூக்கில் தொங்கவிட்டுக் கொன்றுள்ளார். 

டிக் டாக் சர்ச்சை

அந்தக் கொடூரக் காட்சிகளை வீடியோவாகப் பதிவு செய்த அவர் டிக் டாக் செயலியில் பதிவேற்றம் செய்திருக்கிறார். அதைப் பார்த்த பலரும் அதிர்ச்சி அடைந்ததுடன் பழவூர் காவல் நிலையத்தில் புகார் செய்தார்கள். இதையடுத்துப் போலீஸார் அவரைக் கைது செய்தனர்.